Busturialdeko Hitza

murueta » ondare historikoa

Antzinako teilategia birgaitzeko aurrelanetan ari dira

Industria, ingurugiro eta kultur ondarea lotzen dituen gune horren berreskurapenerako proiektua abiatu du Udalak

maite zabalondo

Muruetako Udala aspalditik ibili izan da antzinako teilategia berreskuratu guran, eta dagoeneko hasi dituzte gunea berreskuratzeko lanak. Teilategia birgaitzeagaz batera, ingurugiro eta kultur ondareak ere berreskuratzeko proiektua eramango dute aurrera.

Hiruzpalau eremu berreskuratuko dituzte, beraz: alde batetik, teilategia birgaituko dute bere tximini eta labeekin, hau da, lehengo lantegia izan zena. Beste alde batetik, trenbidearen gainetik teilategiari lotutako buztin harrobia Ðgaur egun arboladi bihurtuta dagoenaÐ ere berreskuratuko dute. Batel tokia ere konpondu egingo dute, guztira, zazpi batel toki eta pantalan bat eginez. Eta hor ondoan zelai edo berdegune bat egingo dute.

Proiektua aurrera eramateko 900.000 euro inguruko aurrekontua dute.

Orain teilategia berreskuratzeko aurrelanetan dabiltza. Jabier Ondarza Muruetako alkatearen esanetan, «ikusi behar da tximiaren eta labeen arteko komunikazioa nolakoa zen, produkzio sistema nola aurrera eramaten zuten, makinak non zeuden, lehortegia non zegoen... Gauza guzti horiek aurkitzeko lur guztia mugitzen dabiltza, eta hori da proiektu guztitik gehien luzatuko den aldea».

«Kontu handiz dabiltza»

Industria ondare horiek zeuden moduan mantentzeko ezin dute edozein makina erabili. Horregatik, batzuk palekin eta atxurrekin ari dira lanean eta makina txiki bat baino ez darabilte. «Kontu handiz dabiltza».

Proiektu guztia 2008rako amaituta izatea aurreikusten du Ondarzak. «Udaberrirako ia dena amaituta izatea espero da. Uste dut labeen eta teilategiaren birgaitzea izango dela gehien luzatuko dena, baina 2008ko urtearen barruan amaitzeko asmoa dago».

Eusko Jaurlaritzak, Patronatuak eta Foru Aldundiak ere parte hartzen dute proiektuan.